24°C
28°C
東至東南風4級，漸轉南風4至5級。
多雲，有驟雨及狂風雷暴。雨勢有時較大。
| 景觀： |  |
||
| 體力： |  |
||
| 難度： |  |
||
| 路線︰ | 粉嶺站➡青山公路➡古洞路➡古洞南路➡古洞配水庫➡麒麟山➡麒麟山坳➡牛潭山➡龍潭古廟➡山排口➡龍潭山➡大羅天➡雞公山➡逢吉鄉路 | ||
| 全長： | 19公里 | 需時： | 3¼小時 |
|
||
| 攀升：1169米 | 下降：1169米 | |
| 最高：572米 | 最低：0米 | |
麒麟山 - (英文：Ki Lun Shan，又叫Hadden Hill） ，海拔高222米。係香港北區嘅山，位於古洞西南面。
牛潭山 - 海拔高337米，是香港新界西北的一座山峰，位於元朗新市鎮和粉嶺／上水新市鎮之間。
牛潭山原名鼇潭山，得名自其南的龍潭山（雞公嶺主峰上的東峰）上名為「鼇潭」的小溪。
牛潭山東西兩半沿山脊分屬北區和元朗區，並不屬於郊野公園範圍。由牛潭山和雞公嶺之間的山坳開始，有軍車路通住潭尾軍營；而另一方向，則有小徑通住蕉徑。
牛潭山西南部為牛潭尾（鼇潭尾／悠潭美），是一平坦谷地和鄉村地帶。
由於牛潭山位置偏僻，亦不屬於郊野公園範圍內，交通不便，平日極少行山人士前往，雖然山體並不陡峭，但山徑雜草較多，亦不易找到其他行山人士協助，故不適合初階行山人士郊遊。
雞公嶺 - （英語：Kai Kung Leng） ，海拔高585米，是香港新界西北的一座山峰，位於元朗新市鎮和粉嶺／上水新市鎮之間。
雞公嶺在十八區區域行政上大部份屬於元朗區，惟東北麓則屬於北區。山嶺大部份屬於林村郊野公園，西北麓除外。
雞公嶺由兩大山峰群組成，雞公嶺主峰上的三個山頭由西至東細分為大羅天（大卦）（572米）、羅天頂（585米）和龍潭山（550米）。其西的副峰稱為雞公山（金雞嶺、小掛（374米）。
該山山體廣闊，而其東、北和西方都沒有比它高的山，所以從元朗和上水等地都可清楚望見。站在山上，可鳥瞰元朗平原和米埔一帶的鄉郊景色以及深圳市區與蛇口一帶景色。
雞公嶺的山脊東西走向，東西兩端分別為蕉徑和逢吉鄉，亦是主要的登山入口。雖然山嶺屬於郊野公園範圍，但沒有任何郊遊設施。
路徑除了沒有維修之外，更因為非法越野機車活動而變得打滑，所以只宜有經驗的遠足者前往。
雞公嶺向北伸展，有牛潭山（337米）和麒麟山（222米）。雞公嶺的東南面有一走向和大小相約的大刀屻和北大刀屻，兩組山峰之間的山谷則建有粉錦公路，沿途主要有八鄉和錦田。
今日出車好好天，早一晚仲諗緊去邊好，知道天氣好當然係要遠征啦。 所以就提出不如黎個山過山大長途，由麒麟山開始，徑牛潭山去雞公嶺。 依條路線會有大量抬車，先係古洞水塘上222米麒麟山，再落返約50米高麒麟山坳，之後就再上337米牛潭山， 再落返近地面MX Club (越野電單車場)，最後上550米龍潭山，抬GEE路都可以話9成，之後大部份雞公嶺都可以玩到。 合共推抬托近千米高，比大帽山還要高，仲要係offroad 路。
今次旅程有我、華哥同奇雲三個。其實華哥同奇雲都帶車上過麒麟山同牛潭山，只有我係第一次上。 一朝早係粉嶺站出，又係去一齊食個早餐食住等。當日仲見到其他車友好似係去紅花嶺。 今次同之前有D唔同，我指係我架車，因為兩條軚都換左，再換左前面BRAKE。所以希望唔會好似之前咁跣。 食飽後就出發，先沿住青山公路踩，直到去到一個天橋位轉去古洞路，好快就會去到古洞街市，轉左轉入古洞南路，再直踩一段路就準備上山。 依個位置上麒麟山有2個選擇，一係由古洞水塘上，另一個係由古洞配水庫上。兩條路華哥都試過，難度亦差不多。 最後決定由古洞配水庫上，因為咁上係可以唔洗走回頭路，同埋中途有靚位可以影心型水塘(即係古洞水塘)。 踩幾十米高到古洞配水庫頂，就要開始抬車。古洞配水庫旁有條路上，都幾窄同途度都幾大下，不過一開始多力冇乜問題，輕輕鬆鬆就上到。 之後係一段山路，斜度低左好多，推同抬一陣就會見到打卡位 - 影心型水塘。沿途遊人都奇怪單車都上到去...哈。 排隊影完唔大似心型GEE水塘後就繼續向麒麟山進發，有一小段可踩路，不久就到最尾路段，都係要抬車，以大石為主，要小心抬怕撞到波腳。 都好快就上到麒麟山頂，山頂開揚有標高柱。小休同打個靚咭，之後就有段落山路玩啦，都好正幾好玩，以泥路、幼沙、碎石路為主。 落小小就見到麒麟西崖，去埋打個卡又上路。華哥一路帶頭，因為佢落唔到GEE路我地都多數9成落唔到，加上佢黎過有經驗。
落麒麟山路況都OK，大部份都叫玩到落到，中途仲有伯伯影住我地。到去到中段，華哥提我同奇雲，依段路都幾斜同有大碎石，上次佢同其他師兄落段。 都有小炒，所以依段我地落到一半，推過大碎石先再落，安全第一，今日路程遙遠有把地方玩唔洗心急。 落左依段路，有兩條路。今次我地落麒麟山坳這邊，華哥都未玩過。這段路超正超順，冇乜難度位，可以享受輕鬆下坡樂趣。 好快就落到麒麟山坳。 麒麟山坳落返低少少，就會見到上牛潭山路段，又係抬車之旅開始。上牛潭山比想象中輕鬆，因為斜度唔算好高，中段亦有一小段可以踩到休下腳。 大約30分鐘左右就上到牛潭山頂。
牛潭山頂景觀都開揚有標高柱，影相打卡後就準備落山。今日全日最難路段就係度，因為果段路真係超跣。華哥挑戰落，一開始已經見佢車左右擺動，但華哥控住，但再落低D就頭軚都打滑，救不了，幸好沒有大礙。 奇雲都係勇者，有挑戰，不過好快就發覺真心好跣。我就見兩個比我強都唔得自動放棄。之後落山路都唔算易但係都玩到GEE。 去到中後段又遇上一齊出發上牛潭山的行山隊。好開心咁一齊影相，山野共融，佢地係一班好有經驗行山隊，對我地車友極友善。 當然我地都好禮讓。 落牛潭山尾段，路緩多了，基本上都可以落晒，仲好好玩。好快就落到山底，見到MX Club路牌，二話不說就入去補給同大休，為上龍潭作準備。 係MX Club買支佳得樂，睇電單車飛JUMP，的確係勁。休左好耐先出發，原本係打算由過背徑上，但眼看這條路太斜。而另一邊路叫山排口亦似可以上到去比較緩點。 最後決定由這路上，雖然緩點但其實亦唔野小。由近50米上550米高，我地打算休大約8次上到頂。 前段已經幾斜下，大約上到高近150米左右會見到路牌同有個好似閉路電視的東東，是怕越野電單車由這路上去吧?係度休息左陣同打卡。之後再上，停一停又再上。 直到一個路口，我行錯了,又要落返黎....又用多左力。最後大約6-7次停下來就到達龍潭山頂。不得不提中後段有個好似牆GEE山坡要上，抬這段小腿都攰了。
到達龍潭山頂，意味要推要再上的地方也不多，就只有雞公嶺的一些上上落落吧~~休息一會後就大夥高高興興咁享受雞公嶺路段。 雞公嶺路段真係十分正，唔單單係佢GEE路況好好，而且景色亦一絶。 一開始由龍潭山頂去大羅天這路比較多上落，但係都好玩。大羅天去英雄石就好正好順好好VIEW。英雄石後的路就更好玩更順了。 原本想試下踩蚯蚓石，但有人唔等就走了。最後爬一段小上坡去雞公山，就係全部的落山路，落山路好順好玩，但尾段的板梯我就怕怕了，只玩了一部份。 今日依個旅程都幾正幾特別，抬得都幾甘下，但係又苦盡甘來。可能就係咁先夠難忘!!
Relive Video
